Hkamja lam hkrak ai masha marai 5 hpe wa shangun

Laiza Muklum kata de du shang wa ai hkrun lam hkawm masha ni hpe Mai Sak Pa hkamja lam jep chyoi dabang kaw nhtoi 14 ya hkamja lam maram masam (Quarantine) galaw ai masha ni marai 21 hta na, nhtoi 14 hpring nna hkamja lam hkrak ai masha ni marai 5 hpe wa shangun sai lam chye lu ai.

“Nhtoi 14 ya tup hkamja lam jep chyoi hkam la nna, laklai lam hpa nnga ai hkamja lam hkrak ai masha ni hpe April shata 19 ya shani marai 3 hte April shata 20 ya shani marai 2 hpe hkamja lam jep chyoi dabang kaw nna tara shang hkamja lam madi shadaw laika jaw nhtawm, tinang nga ai dum nta de wa shangun sai re” nga nna Mai Sak Pa Check Point Dabang Up Salang Kaba Seng Li tsun ai.

Mai Sak Pa hkamja lam jep chyoi dabang hta quarantine masha marai 50 hpe galoi mung tawn na matu masat da ai rai nna, April shata 20 ya shani du hkra rai yang quarantine tawn ai masha yawng marai 16 re hte quarantine masha ni hpe lit nga ai tsi Sara ni kaw nna lani mi hta 3 lang hkum kahtet shadang shadawn ya nga ai re lam, Salang Kaba tsun ai.

Malu masha hte seng nna gaw Covid-19 Ana Zinli Makawp Ninghkap Komiti kaw nna, quarantine hkamla ai masha ni hte ra mara garum madi shadaw ya nga ai apnawng ramma ni hpe, lani mi na simai manu Miwa gumhpraw Yun 10 jahkrat ya ai re. Ya aten Mai Sak Pa hkamja lam jep chyoi dabang kaw hka mayak mahkak nga ai re hpe mung chye lu ai.

April shata 19 ya shani hta Miwa Gumsan Mungdan Asuya kaw na Tsi Sara Wun ni marai 8 gaw, Ginjaw Hkamja Dap na Tsi Sara Wun marai 16 hpe laksan lata la nna, Covid-19 ana sawng wa yang gara hku makawp maga ra ai lam ni hte seng nna, wunkat jaw ai lam galaw nhtawm, Mai Sak Pa hkamja lam jep chyoi dabang de mung, sa du n gun jaw hpaji jaw gawan da ai lam chye lu ai.