Hkamja lam jep chyoi dabang hpaw hpawng galaw
Wunpawn Mungdan Shanglawt Asuya Covid-19 Ana Zinli Makawp Ninghkap Komiti ni a hkamja lam jep chyoi dabang gawgap la lu sai hpe Karai Kasang kaw ap ya ai wunli la akyu hpyi hpawng hpe April shata praw 7 ya shani Mai Sak Pa mare kaw galaw ai lam chye lu ai.
Hpawng hta nawku hpung woi Sara kaba ni, Sara Kaba Sumlut Gam (KIO Ginjaw Komiti Tingnyang Up Malai II), Covid-19 Ana Zinli Makawp Ninghkap Komiti Salang ni hte Mai Sak Pa mare hkamja lam jep chyoi ai dabang kaw woi awn ai Salang ni sa du shang lawm ai re.
Gawgap da lu sai shara ni gaw, Ta kashin shara 12, mying jahpan hta shara, tsi jep hkam na masha ni hkring sa na nta, ana jep chyoi na shara, ntsen nhten ai masha ni hpe shanga na shara ni, shat gawk, jitdum namdum ni hte magam gun ni nga na shara ni hpe galaw da sai lam, Mai Sak Pa Check Point Dabang Up Hpakawn Seng Li (Laiza Ginwang Ningtau Uphkang Du) tsun ai.
Shani shagu lit nga ai tsi Sara ni kaw nna ding yang jep chyoi nhtawm, laklai nna ntsen nhten ai masha ni nga wa yang, seng ang ai ana zinli hte seng ai komiti de tang madun ap na matu hkyen lajang da ai lam, Dabang Up Hpakawn Seng Li tsun ai.
“Ana hte seng ai makawp maga ai lam hpe tinang na tinang chye ai hku galaw sa wa ai nre sha, Ginjaw kaw na langai sha rai wa lu hkra, Mungdan ting hta hkrang langai sha, tara langai sha, hkan nang hkan sa ai lam mung, bungpre hkra ngu yaw shada ai re, ya aten bungli grai dam lada ai lam anhte hta lawan ladan rai byin taw nga ai ten re majaw, ya hpang e gaw hkumtsup hkra galaw sa wa na re” nga nna Du Kaba Hing Wawm tsun ai.
Ndai dabang hta shinggan kaw na Laiza de du shang wa ai laiwa laisa masha ni hpe ana makawp maga ai hku nna, ntsen nhten ai masha ni hpe nhtoi 14 ya yu maram masam tawn ai shara rai nna, nhtoi 14 ya maram nna hpa nra jang Laiza de jashawn na hte Laiza kaw na pru wa ai ni hpe gaw hkamja lam ding yang jep chyoi ya nga ai re hpe chye lu ai.
Mai Sak Pa check point kaw masha pru shang gawnhkang Makan Dap, Mungchying Uphkang Dap, Hkamja Dap, Ginjaw Shim Hpyenman Laiza Ginwang Masat (1) MHH Dap Dung kaw na magam gun ni hte mahkri shawn nna lit la galaw nga ai re lam chye lu ai.
