Hkau hting hkau na nlu ai mungmare masha ni hpe lamu ga Eka 200 masat jahkrat
Hu Gawng Ginwang, Nawng Myi mare kaw hkau hting hkau na nlu ai jau man masha ni hte sumtsan kaw na htawt wa ai ni hpe Jinghpaw Mungdaw Asuya kaw nna Hka Chyang Hka hte Magawng Hka lapran kaw galaw lu galaw sha shara lamu ga Eka 200 masat jahkrat ya nhtawm, lamu ga ganaw bungli shang nga sai lam na chye lu ai.
“Asuya kaw nna Mungdaw masing hku lamu ga Eka 200 jahkrat ya ai lam re. Ndai hpe Waimaw Company ni lit la nna galaw ya ai hta, n ngut kre shi ai re majaw lamu ga hpe galoi garan ya na gaw nchye shi ai re” nga nna Nawng Myi mare kaw na Myo Ne Si Man King Komiti malawm Salang Shangding Bawk Naw tsun ai.
Hkau hting hkau na nlu ai Nawng Myi mare na nta htinggaw 35 hpe jahpan hta da sai re, htingaw mi hpe lamu ga Eka 5 garan ya na matu htang da ai raitim, Eka kade ang wa na ngu ai hpe Myo Ne Salang ni hte Komiti ni jahkrup nna gayan ya na re lam na chye lu ai.
Ndai lamu ga gaw Bankuk San Pra ni shawk shawn da ai lamu ga re. Raitim mung Asuya hpe shanhte shawk shawn ai hta San Pra Nawng Myi ngu shawk shawn da ai re majaw, Nawng Myi mare hpe Myo Ne kaw na jahkrat ya ai kata kaw San Pra kaw na Lisu ni gaw Pyi Ne kaw shanhte shawk shawn da ai majaw jahkrat ya ai re nga nna tsun wa ai majaw, Pyi Ne Salang ni hte sang lang dan ai daw sha naw lu galaw ai re hte lamu ga hpe galoi aten lu garan na re hpe nchye lu shi ai re lam, Salang Shangding Bawk Naw tsun ai.
Asuya kawn lamu ga jahkrat ya ai lam hte seng nna manghkang naw nga taw ai re majaw, ndai manghkang hte seng nna jahkrup bawngban ai lam, gara hku hparan sa wa na ngu ai mahkrun naw tam nga ai re hpe na chye lu ai.
