Sinna Ginwang Ginjaw, KIA Dap Ba ( 2 ), Dap Dung ( 14 ) ginra Nban Hka mayan e, shamu shamawt nga ai, Myen hpyen dap Hk.L.Y ( 126, 238 ) na hpyen hpung ni, June 15 ya shani hkauna galaw ai mungmasha ni hpe hkan gau shapraw nga ai lam, buga masha ni kawn chye lu ai.
Dai Myen hpye hpung ni gaw, Nawng Kawk pa, N-yang Yu pa, hte Sut Chyai pa mayan na hkauna galaw sha nga ai mungmasha ni hpe hkan gau shapraw hkawm ai lam chye lu ai.
Myen hpyen dap ni, ya na zawn hkau na galaw sha nga ai mungmasha ni hpe gau shapraw wa ai majaw, mungmasha ni hkauna galaw na matu yak hkak nga ai. Hpa majaw gau ai re hpe nchye ai lam, dai ginra na salang langai tsun ai kawn chye lu ai.
