Hkawng Lang Hpu ginra majan laja wa na hpe ginra masha ni myit tsang nga

Hkawng Lang Hpu ginra hta gasat gala majan laja lana matut byin wa na hpe ginra mungshawa ni myit tsang nga ai lam chye lu ai.

Gumshem Myen hpyen dap ni October shata htum wa maga kaw nna ya aten du hkra, Hkawng Lang Hpu ginra de hpyen n-gun jat bang nga ding yang re ai majaw, gasat gala majan laja lana matut byin wa na hpe mungshawa ni myit tsang nga ai lam, ginra masha ni kaw na chye lu ai.

Hkawng Lang Hpu ginra na P.T.Ts dap shara (4) hpe KIA pawng hpawm hpyen hpung ni gasat zing kau ai hpang gumshem Myen hpyen dap ni gaw, hpyen n-gun jat bang nga ai sha n-ga, laknak arung arai, malu masha ni htaw sa nna, hpyen n-gun htu shadut shamu shamawt nga ding yang re ai lam, ginra masha ni kaw na matut chye lu ai.

Ndai zawn gumshem Myen hpyen dap ni hpyen n-gun htu shadut shamu shamawt nga ding yang re ai hta gasat gala majan laja lana matut byin wa na hpe myit tsang nga ai majaw, dai ginra na mungshawa nkau hpyen koi yen nga ai lam chye lu ai