Hkum Dingnum Bawngring Jawng yu hpawng galaw
Kuthkai Ginwang Garum Kahtau Hte Bawngring Dap kaw nna hpaw sharin ya ai Hkum Dingnum Bawngring Jawng yu hpawng hpe Kuthkai Ginwang Maw Hik Hka Nan Bawring Sun wang kaw October shata praw 1 ya shani hkying 10:00am aten kaw nna hkying 12:00pm aten laman galaw la lu sai lam chye lu ai.
Hpawng lamang hta jawngma ni a presentation lamang hte jawng yu jawngma ni marai 11 hpe jawng yu lakmat shagrau ai lamang ni galaw ai lam chye lu ai.
Kuthkai Ginwang kata na ramma ni law malawng gaw kaga maigan de ang katut bungli sa galaw ai, shinggan de ja gumhpaw tam hkawm ai ramma ni law ai majaw, hkai lu hkai sha rem lu rem sha npawt nhpang gawgap ai sut ningmu hku nna lamu ga nhprang ni hpe jai lang let shang gumhpraw lu ai bungli langai hpe galaw lu na matu yaw shada let bawngring hpaji ni hpe sharin ya ai re lam, Kuthkai Ginwang Garum Kahtau Hte Bawng Ring Dap Hpa-awn, Lahta Sammung Htoi Ninghkawng Foundation Kuthkai Lakung Lithkam Rev. Labya Seng Lun tsun dan ai.
Daini jawng yu ai jawngma ni hpe 2020 ning July shata kaw nna September shata du hkra, shata 3 tup, hkai lu hkai sha rem lu rem sha ladat hpaji ni hpe tatut sharin ya ai rai nna, ningpawt ninghpang gawgap hpaji ni, kawa lata hpaji ni, gat lawk, sut masa hpaji, chyum laika hte bawng ring hpaji ni hpe sharin ya ai re lam chye lu ai.
Jawng yu sai jawngma ni gaw tinang mare buga ginra ni, wuhpung wuhpawng ni hta tatut bungli galaw sa wa na rai nna, jawngma nkau ni gaw Kuthkai Ginwang Garum Kahtau Hte Bawngring Dap kaw apnawng daw jau na jawngma ni mung lawm ai lam chye lu ai.
Ndai Hkum Dingnum Bawring jawng gaw Kuthkai Ginwang kata buga mare kaw na asak 18-30 ning lapran na ramma ni hpe madung dat sharin ya ai lamang rai nna, COVID-19 ana kap bra nga ai aten ladaw re majaw, jawng yu hpawng hpe COVID-19 ana makawp maga rit kawp tara hte maren marai 15 njan ai sha lamang hpe angwi apyaw galaw la lu sai lam chye lu ai.
Photo Credit; Maw Nuk Shekoi
