Hkum Tsai Yang gumshem Myen hpyen dap hpe KIA zing
Hugawng Lido lam ntsa, Hkum Tsai Yang kaw dap jung nga ai gumshem Myen hpyen dap hpe KIA ni zing madu la lu ai lam chye lu ai.
July shata 10 jahpawt hkying 4:00am aten daram kaw nna, Lawa Hkum Tsai Yang lup wa kawng kaw dap jung nga ai, gumshem Myen hpyen dap, P.T.Ts pawng hpawm hpyen hpung ni hpe KIA pawng hpawm hpyen hpung ni htim gasat wa ai hta hkying 6:00am aten kaw gasat zing la lu sai lam, lit nga ai salang ni tsun ai.
Gumshem Myen hpyen dap ni gaw, ya aten Myitkyina Hpakant lam ntsa hte Hpakant ginra hta hpyen shamu shamawt htu shadut shara la nga ai majaw, KIA ni hte jahkring hkring ngu na gasat gala majan byin nga ai re.
July shata 11 ya shani ka-ang aten daram hta mung, Hpakant Masat (26) Dap Dung ginra hta Tada-U kaw na rawt lung wa ai gumshem Myen hpyen dap Jet nbungli (2) hte bawm wa jahkrat bun ai lam ni nga ai hpe chye lu ai.
