Hkum Tsai Yang kaw gasat gala majan byin

KIA Masat (2) Dap Ba ginra, Hkum Tsai Yang mayan kaw gasat gala majan byin ai lam chye lu ai.

April shata 13 ya jahpawt hkying 9:00am daram kaw na, Danai lam Lawam hte Dumbung mara lahta Lawa Hkum Tsai Yang maga kaw gumshem Myen hpyen dap pawng hpawm hpyen hpung ni hte KIA ni gasat gala majan byin ai lam, shawnglam lit nga ai salang ni kaw na chye lu ai.

Gumshem Myen hpyen dap hte P.T.Ts pawng hpawm hpyen hpung ni Hkum Tsai Yang maga de n-gun kaba hte htu shadut htim gasat wa ai majaw, gasat gala majan byin wa ai re lam chye lu ai.

Danai Ledo lam lapran hta gumshem Myen hpyen dap hte P.T.Ts pawng hpawm hpyen hpung ni hpyen shamu shamawt shara la nga ai majaw, laiwa sai March shata htum wa maga kaw nna, KIA ni hte jahkring hkring gasat gala majan byin nga ai re.