Hkyuk htawng kaw sharen da hkrum ai sara/num 3 hta na Saranum Nang Pu lawt pru wa sai
Majan lapran chyat rawng nga ai mungshawa ni lawt pru wa na matu n gun madun woi awn ai majaw Myitkyina hkyuk htawng de sharen da hkrum ai sara Zau Jat, Sara Lum Zawng hte Saranum Nang Pu marai masum kaw na Saranum Nang Pu gaw daini April shata praw 5 ya jahpawt hkying 7 jan aten hta Myitkyina hkyuk htawng kaw na lawt pru wa sai lam chye lu ai.
“Lawt wa ai majaw grai kabu sai raitim mung ngai hte rau sharen da hkrum ai Sara Lum Zawng hte Sara Zau Jat yan nlawt pru wa shi ai majaw myit npyaw ai ya naw rawng taw ai sara yan mung lawan pru wa lu na matu myit mada ai” nga nna Saranum Nang Pu shi hkam sha ai lam hpe tsun dan ai.
Myusha lam hte myu shayi hte seng nna matut galaw sa wa na re. Anhte a Mungdan tara rap ra lam hte seng nna galaw na matu grai naw ra ai hpe mu mada ai. Htawng de du wa ai shaloi ntara ai sha sharen da hkrum ai masha ni hpe law law mu lu ai. Anhte a Mungdan hpe greng ai Democracy Mungdan byin na hku mi rai rai, jet ai hkrung grin ngang kang ai simsa lam hpe lu hkra galaw na mi rai rai, tengman dinghpring ai hku tara dawdan sa wa na gaw grai ahkyak ai lam, Sara Zau Jat hte Sara Lum Zawng yan hte seng nna seng ang ai ntsa tsang rung de matut nna tang madun sa wa na re lam Saranum matut tsun ai.
Laiwa sai 2018 ning May shata hta Sara Lum Zawng, Sara Zau Jat hte Saranum Nang Pu hku nna majan lapran chyat rawng nga ai mungshawa ni lawt pru wa na matu Myitkyina kaw shawa n gun woi madun ai hta Myen hpyen dap hpe gaya jahkrum ai ga si ga ngau ni lawm ai ngu nna Myen Du Kaba Myu Min Oo kaw nna Pukma 500 hte tara jawat da hkrum ai re.
Tara jawat da ai hpang 2018 ning December shata praw 7 ya shani hta Myitkyina tara rung kaw nna marai 3 hpe marai langai hta gumhpraw dam 500000ks hte htawng dam shata kru jahkrat hkrum ai re.
Ndai sara/num marai 3 hte seng nna Jinghpaw Mung tara dat kasa rung de tengman ai hku tara dawdan ya na matu lang hte lang tang shawn ai hpang Saranum Nang Pu gaw hkamja lam a majaw mi dawdan da ai shata 6 kaw na shata 4 hte lawt pru wa ai lam chye lu ai.
