Hkyuk htawng sin ai gumshem Myen hpyen la hte Balik ni sinat kaba hte gasat hkrum

Hpakant Lawnghkang gaiwang Mazup Yang hkyuk htawng kaw sin ai, gumshem Myen hpyen la hte Balik ni, June shata 22 ya jahpawt hkying 4:30am aten hta sinat kaba hte gasat hkrum ai lam chye lu ai.

Gumshem Myen hpyen dap Hk.L.Y 76 hte masat 28, 30 na pawng hpawng hpung ni sin nga ai hpe KIA ni sinat kaba hte sa gap gasat ai re.

Ndai zawn gasat hkrum ai hta gumshem Myen hpyen ni si hkala hkrum ai majaw, lai wa lai sa mungmasha ni hpe sawk jep ai lam ni galaw ai re lam chye lu ai.

Ndai gumshem Myen hpyen hte Balik pawng hpawng hpyen ni kawn June shata 19 ya shani hta Maw Bung Mare de laknak kaba hte gap bun ai majaw, mungmasha marai 3 hkala hkrum lai wa sai re hpe mung chye lu ai.