Hopin mare kaw nta masha marai (6) sat hkrum
Monyin ginra, Hopin mare kaw damya mya la nna, nta masha marai (6) hpe sat kau da ai lam chye lu ai.
March shata praw 4 ya shana hkying 11:00pm aten daram hta Hopin mare, Myatharyar lawk na nta langai kaw manu dan ai arung arai ni hpe damya mya la nna, nta masha marai (6) hpe mung sat kau da ai lam, ginra masha ni kaw na chye lu ai.
Sat hkrum ai nta masha ni gaw, nta madu wa asak (40) ning, madu jan asak (40) ning, nta kaw garum na matu shaga da ai num hpawmi asak (40) ning grup yin ni hte kasha ni marai (3) asak (5, 11) ning lapran na ni re ai lam chye lu ai.
Ya aten asak si sum mat sai nta masha ni a moi mang hpe seng ang ai ni hku nna tsi rung de htaw mat wa sai rai nhtawm, ndai masha sat amu hpe gadai wa, gadai ni sat ai ngu ai hpe ya aten rai nchye lu shi ai re lam chye ai.
Jinghpaw mung kata na Muklum kaba ni hta ya na zawn masha sat amu manghkang, lagu lagut damya mya ai lam ni jahkring hkring byin wa ai lam gaw, gumshem Myen hpyen dap ni Myen mungdan a daru magam ahkang aya hpe zing madu la kau ai hpang kaw nna, lani hte lani grau grau sawng wa ai re lam chye lu ai.
