Hopin ninghtawn kata ka-ni lu sha ai hte dut ai masha marai 20 jan hpe lu rim

Hopin ninghtawn kata pat jasan komiti ni kaw nna, pat jasan bungli shang galaw ai hta ka-ni lu sha ai masha hte dut hpaga galaw ai masha marai (20) jan hpe lu rim la ai lam chye lu ai.

September shata praw 4 ya shani Mungnyang Ginwang, Sinna Dingda Ginwang Ginjaw hte Ginra daju pat jasan komiti ni pawng hpawm nna, Hopin ninghtawn kata pat jasan bungli shang yang lu sha ai masha marai (20) hte dut hpaga galaw ai masha (4) hpe lu rim la ai lam, Ginwang pat jasan komiti ni kaw na chye lu ai.

Ka-ni dut hpaga galaw ai U Let Ya, Kyaw Myaing, Ku Si hte U Su Mo Chyit ni hpe gaw ka-ni nanghpam hpaga arung arai hte hpawn lu rim la ai rai nna, lu sha ai masha ni hpe mung pat jasan komiti kaw nna seng ang ai Ginwang Ginjaw tara rung de ap ya nna ahkyak la hparan sa wa na re lam chye lu ai.

Hopin ninghtawn kata pat jasan bungli hpe galaw nga ai kaw lu sha ai masha hte dut hpaga galaw nga ai masha ni hpe rim ahkyak la nga ai sha n-ga, matut nna mung pat jasan bungli hpe galaw sa wa na re lam chye lu ai.