Hpai Kawng mare makau na jarit manghkang hte seng nna Miwa hte Myen bawngban hparan ai lam rai nnga shi
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Munggu Ginwang Bang Sai Ninghtawn, Hpai Kawng mare hpyen yen mungshawa ni nga ai shara kawn Miwa Mung Nawng Lung mare de sa wa ai jarit manghkang hte seng nna jahkrup bawngban ai hpe n-galaw shi ai lam, Hpai Kawng mare masha langai kawn chye lu ai.
September 19 ya jahpawt Miwa Balik ni gaw Beijing kaw na matsun re ngu nna, Myen Mung hkran maga meter 30 jan concrete sement ni hte jarit shadaw htawt masat wa ai hpe, mare masha ni hte Bang Sai Myu Ne Mu ni sa tsun ai majaw, dai shana de hkying 5:00pm aten hta hpri arung arai ni hpe bai run htaw mat wa sai re.
Miwa ni htu di tawn ai shara hpe ga bai kaput kau na matu, mare masha ni Bang Sai Myu Ne Mu ni hpe sa tsun yang rai hkum rai shi mu, anhte mung rung bungli hte seng nna naw galaw nga ai ngu sha hkap tsun nhtawm, gara shani hta tsun hparan na hpa mung ntsun ai. Miwa ni gaw dai shara hpe shani shagu ngu na sa gawan yu nga ai lam chye lu ai.
