Hpaji jawng laika sharin ladat nnan sharin sara tai wunkat galaw
Ginjaw Hpaji Dap kaw nna woi awn nhtawm, hpaji jawng laika sharin ladat nnan sharin sara tai (TOT) wunkat hpe Laiza Hotel Zuphpawng Gawknu kaw July shata 17 ya shani kaw nna July 22 ya shani du hkra galaw ai lam chye lu ai.
Ndai wunkat gaw sharin sara ni a sharin achyin ai lam grau nna kung kyang wa lu na matu hte sharin sara law law hpe bai sharin shalat ya ai TOT wunkat rai nna, ndai wunkat hpe sharin hkam la ngut sai sharin sara/num ni gaw tinang ginwang ginjaw kata lawu tsang daw na sharin sara/num ni hpe wunkat bai jaw sa wa na re lam chye lu ai.
Wunkat hta Myen Asuya Hpaji jawng kaw na sharin laika, sharin malawm, sharin ladat ni hpe sharin ya ai rai nna, Myen textbooks ni hta mung sharin ladat nnan grai galai shai wa sai re majaw, Myen textbooks kaw na sharin matsun, sharin ga baw sharin malawm, laika buk a yaw shada lam ni hpe lu rim la na matu hte Ma ni hpe madung dat ai sharin ladat ni hpe sharin ya ai re lam, Ginjaw Hpaji Dap Ningtau Amu Madu Sara Kaba Hpun Pyen Zau Hkyen tsun dan ai kaw na chye lu ai.
Hpaji Dap kaw nna tinang ginra masa hte htap htuk ai sharin matsun sharin malawm lu wa hkra galaw taw nga ai aten laman, Myen Asuya Hpaji Dap kaw nna shapraw da ai textbooks laika ni hpe sharin sa wa ai aten, jawngma kanu kawa ni a man hta yu shut kam shut na lam byin wa mai ai re majaw, nhkum tsup ai lam ni nga wa yang kanu kawa ni hku nna Ginjaw Hpaji Dap hte seng ang ai Ginwang Ginjaw shagu na hpaji Du ni hpe san jahkrup mai ai lam, Sara Kaba matut tsun ai.
“Hpaji lam hte seng nna tsun ga nga yang kaning re mung hpaji re, raitim mung anhte wunpawng amyusha ni a myit sawn sumru lam, htunghking maka ginra masa hte htap htuk ai hku nna anhte gin shalat la ra ai, tinang ginra hte htap htuk ai sharin matsun sharin malawm ni nlu shi ai lapran, Myen asuya ni a sharin matsun sharin malawm, textbook ni hpe sharin sa wa ai lam hta mung anhte hte nhtap htuk ai ga baw ni, makam masham lam, labau zawn re ni hpe di kau nna sharin sa wa na re” nga nna tsun ai.
Sharin sara tai wunkat hta Laiza Muklum kaw na sharin sara/num ni, Hpaji Du ni, Ginjaw Ginra Ginwang Ginjaw, Sinpaw Ginwang Ginjaw, Dingda Ginwang Ginjaw hte IEd sara tai jawng kaw na sharin sara/num ni marai 40 sa du sharin hkam la ai lam chye lu ai.
