Hpakant, Danai Ledo lam Lawa Mare kaw KIA hte gumshem Myen hpyen dap npu na Pyi Tu Tsit ni gasat gala majan byin
Hpakant, Danai Ledo lam Lawa Mare kaw shara la nga ai, gumshem Myen hpyen dap npu na Pyi Tu Tsit hpyen hpung ni hpe, March shata 31 ya jahpawt hkying 5:30am aten daram kaw nna, KIA hpyen hpung ni sa htim gap gasat ai lam chye lu ai.
March shata 25 ya shani hta mung, KIA hte Pyi Tu Tsit hpyen hpung ni Lawa Mare kaw gasat poi byin ai lam nga ai, Kamaing Byuha Kawng kaw nna mung, gumshem Myen hpyen ni laknak kaba hte grup gra de gap shadam ai lam mung nga ai re.
Ndai Pyi Tu Tsit hpyen hpung ni gaw, March shata 22 ya shani kaw nna, Lawa Mare laika sharin jawng hte Hpunggyi jawng ni hta shara jahkrat nga ai re lam, ginra shiga lawk kaw na chye lu ai.
Manmaw hpyen man maga de mung, hpyen masa shaja hkat nga ding yang rai nna, gumshem Myen hpyen dap ni gaw, nbungli drone ni hte shani shagu bawm jahkrat gasat nga ai majaw, mungshawa si hkala hkrum ai sha n-ga, dum nta ni mung law law hten za, wan hkru ma sai lam, shawng lam na lit nga ai salang ni tsun ai kaw na chye lu ai.
