Hpakant Gaiwang kata na ginra ni hta Htunghking Gaw Sharawt Sut Dek tawn hpang

Hpakant Gaiwang Htunghking Hpung kaw nna woi awn nhtawm, Hpakant Gaiwang kata na ginra (4) rai nga ai Hpakant Myo Ma, Maw Wan, Mashi Kahtawng hte Uru Hka Nan ginra ni hta Htunghking Gaw Sharawt Sut Dek (200) hpe September praw 1 ya shani kaw nna shawng nnan tawn hpang ai re lam chye lu ai.

Ndai Htunghking Gaw Sharawt Sut Dek hpe Hpakant Gaiwang kata na ginra langai mi hta sut dek 50 garan ya ai re lam, matut nna mung, mungshawa a ningmu, mungshawa a madi shadaw ai hta hkan nna bai galaw jat na masing nga ai lam chye lu ai.

Hpakant Gaiwang kata hta Htunghking Gaw Sharawt Sut Dek tawn ai yaw shada lam gaw, “Dinghku de ram nna, yak hkak nga ai ramma ni hpe dinghku de ai lam hta dang di lu ai daram, garum madi shadaw lu na matu, laklai ai hte laika hpaji ningtawn ai ni hpe garum madi shadaw lu na matu hte tara shang dinghku hta na, kasha (7) a lahta shangai shaprat ai ni hpe mung dang di lu ai daram garum madi shadaw lu na matu yaw shada ai re” nga nna Hpakant Gaiwang Htunghking Hpung Ningtau Ningbaw (II) Salang Nbau La Raw tsun ai.

Mungchying mungshawa ni madi shadaw ai hta hkan nna, lu wa ai ja gumhpraw ni hte Htunghking hta ra ai lam, Hpakant Gaiwang kata kaw na ramma ni hpe Htunghking hte seng ai majat hpaji, Htunghking lai ladat hpaji ni sharin ya na lam, Kanu num ni hpe Htunghking hte seng ai bu hpun palawng Da sharin ya ai jawng hte Kawa la ni hpe Htunghking gun rai galaw shapraw jai lang na matu n-dup dap ni hpaw lu na matu yaw sing da ai lam ni mung nga ai lam Salang wa matut tsun dan ai kaw na chye lu ai.

Ya na zawn Hpakant Gaiwang kata Htunghking Gaw Sharawt Sut Dek tawn ai lam hpe mungchying mungshawa a myit hkrum, myit hkawn ai hta hkan nna shaning na na galaw sa wa na masing nga ai re hpe chye lu ai.