Hpakant ginra hta gasat gala majan laja lana byin nga
Hpakant ginra hta KIA hte gumshem Myen hpyen dap ni gasat gala majan laja lana byin nga ai lam chye lu ai.
August shata praw 2 ya jahpawt hkying 8:00am jan aten daram kaw nna, Hpakant Sharaw Hka mare, Lagat Kawng shara kaw KIA pawng hpawm hpyen hpung ni hte gumshem Myen hpyen dap pawng hpawm hpyen hpung ni gasat gala majan laja lana byin nga ai lam, shawnglam lit nga ai salang ni shana wa ai.
Tatma (33) npu na gumshem Myen hpyen dap pawng hpawm hpyen hpung ni, Tawng Cho mare lam hku nna htu shadut lung wa ai majaw, gasat gala majan byin wa ai rai nna, Hpakant tatma kawng kaw nna mung, majan byin ai shara de laknak kaba ni hte gap garum ya ai lam ni galaw nga ai hpe chye lu ai.
Hpakant ginra de gumshem Myen hpyen dap pawng hpawm hpyen hpung ni gaw, hpyen man shara shagu hku nna htu shadut shara la shamu shamawt nga ai majaw, KIA pawng hpawm hpyen hpung ni hte gasat gala majan matut manoi ngu na byin nga ai re.
Matut nna Manmaw ginra hta mung, gumshem Myen hpyen dap ni nbungli, drone ni hte gap gasat ai lam galaw nga ai sha n-ga, hka lam hku nna mung htu shadut nga ai majaw, ya aten lahkawng maga hpyen masa shaja hkat nga ding yang re ai hpe chye lu ai.
