Hpakant ginra hta gasat gala majan matut byin nga
Hpakant ginra hta KIA hte gumshem Myen hpyen dap ni gasat gala majan matut byin nga ai lam chye lu ai.
July shata praw 4 ya jahpawt hkying 8:00am aten daram kaw nna, Nma Yang lupwa kawng hte Sut Bum maza bum mare lapran kaw, KIA pawng hpawm hpyen hpung ni hte gumshem Myen hpyen dap pawng hpawm hpyen hpung ni gasat gala majan laja lana bai matut byin nga ai lam, lit nga ai salang ni kaw na chye lu ai.
Gasat gala majan byin nga ai hta Hpakant Byuha kawng hte Ginsi kaw dap jung nga ai, gumshem Myen hpyen dap ni laknak kaba hte gap gasat garum ai lam ni galaw nga ai hpe chye lu ai.
Hpakant ginra hta gumshem Myen hpyen dap ni kalang bai htu shadut shara la wa ai hpang, gasat gala majan nbyin ai aten hta raitim, laknak kaba, drone ni hte hkrup mara gap gasat ai lam ni a majaw, mungshawa ni asak si sum ai lam shani shagu ngu na matut byin nga ai re.
