Hpakant ginra hta gasat gala majan matut byin nga
Hpakant ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam chye lu ai.
February shata 11 ya jahpawt kaw nna, Hpakant Mashi Kahtawng grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam, ginra masha ni kaw na chye lu ai.
Gasat gala majan byin nga ai hta gumshem Myen hpyen dap kawn, laknak kaba, drone ni hte hkup mara gap bun ai sha n-ga, mungshawa laiwa laisa modo lam hkan mung, bawm hkrup mara hkam da ai majaw, February shata 11 ya shani, mungshawa langai bawm kabye kapaw la nna, asak si sum mat ai lam chye lu ai.
Waimaw Lamyang hte Manmaw hpyen man ginra ni hta mung, KIA pawng hpawm hpyen hpung ni hte gumshem Myen hpyen dap ni shani shagu ngu na gasat gala majan byin nga ai rai nna, lahkawng maga hpyen masa shaja hkat nga ding yang re ai lam chye lu ai.
