Hpakant ginra hta gasat gala majan matut manoi byin nga

Hpakant ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai lam chye lu ai.

February shata praw 7 ya jahpawt hkying 9:00am aten daram kaw nna, Hpakant Mashi Kahtawng grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam, lit nga ai salang ni tsun ai.

Gasat gala majan byin nga ai hta gumshem Myen hpyen dap gaw, mungshawa ni nga ai shara de laknak kaba hkrup mara gap bun nga ai rai nna, ya aten lahkawng maga hpyen masa shaja hkat nga ding yang re ai lam chye lu ai.

Ya aten Hpakant, Waimaw, Indawgyi hte Manmaw ginra ni hta gumshem Myen hpyen dap gaw, shawoi na hta grau hpyen n-gun kaba hte htu shadut htim gasat nga ai sha n-ga, nbungli, drone, laknak kaba ni hte hkrup mara gap gasat ai lam ni galaw nga ai majaw, mungshawa si hkala hkrum nga ai hte dum nta ni mung hten za hkrum nga ai re.