Hpakant ginra hta hpyen masa shaja hkat nga
Hpakant ginra hta KIA hte gumshem Myen hpyen dap ni hpyen masa shaja hkat nga ai lam chye lu ai.
Laiwa sai April shata htum wa maga kaw nna, Hpakant lam de htu shadut lung wa nga ai, gumshem Myen hpyen dap hte P.T.Ts pawng hpawm hpyen hpung ni ya aten, Hpakant ginra de du shang shara la nga sai majaw, KIA hte hpyen masa shaja hkat nga ding yang re ai lam, lit nga ai salang ni kaw na chye lu ai.
Gumshem Myen hpyen dap ni hpyen n-gun kaba hte htu shadut lung wa nga ai majaw, KIA hte gasat gala majan ni byin nga ai rai nna, gumshem Myen hpyen dap ni gaw mungshawa ni hpe mara kata rim woi, masha ninggang shatai ai lam ni galaw nga ai hpe chye lu ai.
Ya aten gumshem Myen hpyen dap ni gaw, Maw Wan mare, Le Pin mare hte Lawnghkang mare ni hkan hpyen shamu shamawt hkawm ai lam ni galaw nga ai hta May shata 28 ya shani hta mung, mungshawa nkau hpe sawk jep, adup zingri ai lam ni galaw ai hpe chye lu ai.
Ndai zawn gumshem Myen hpyen dap ni hpyen n-gun htu shadut ai lam ni ding yang galaw nga ai hta gasat gala majan laja lana byin wa na hpe tsang ai majaw, dai ginra na mungshawa ni hpyen koi yen nga ai lam chye lu ai.
