Hpakant ginra hta masha sat hkrum ai lam shani shagu byin nga

Hpakant ginra hta masha sat hkrum ai lam shani shagu ngu na byin nga ai hpe chye lu ai.

Gumshem Myen hpyen dap ni, Hpakant ginra hta kalang bai htu shadut lung wa ai hpang, June shata praw kaw nna masha sat hkrum ai manghkang shani shagu ngu na byin nga ai lam, ginra masha ni kaw na chye lu ai.

Masat si hkrum ai lam gaw, gumshem Myen hpyen dap ni a laknak kaba, drone bawm, sinat hte gap sat ai lam ni a majaw asak si hkrum ai rai nna, ya aten Hpakant ginra kata masha marai 40 jan asak si sum mat sai lam chye lu ai.

Ndai zawn masha gap sat hkrum ai lam shani shagu ngu na byin nga ai majaw, Hpakant ginra kata nga ai mungshawa ni shimlum lam nnga ai sha n-ga, hkawmsa hkawmwa galaw lu galaw sha lam amyu myu hta mung, hkrit tsang let sha hkawm sa nga ra ai lam matut chye lu ai.