Hpakant ginra kaw lung seng ret jak rung bai gawgap na matu hkyen lajang nga

Wunpawng Amyusha Zinlum Hpung ni woi awn ai hte Hpakant San Chyoi, Maw Tawng lam kaw amyu shayi ni hpe madung dat ai lung seng ret jak rung langai November shata laman bai gawgap sa wa na matu hkyen lajang nga ai lam chye lu ai.

“Anhte a amyu shayi ni hpe kan bau bungli lu galaw sha hkra yaw shada ai hte nanghpam dawn dabang kaw na pru wa ai amyu shayi ni hpe lakawn lanawn let hpaji sharin ya na matu masing nga ai. Lung seng gaw anhte Hpakant kaw nga ai re majaw, mai galaw na re mai byin na re ngu da ting galaw sa wa ai re” nga nna Wunpawng Amyusha Zinlum Hpung Amu Madu, Salang Dashi Naw Lawn tsun ai.

Lung seng ret jak rung hpe Mawsizar kaw shawng nnan jak rung langai gawgap nhtawm, amyu shayi ni hpe woi awn galaw hpang nga sai rai nna, Hpakant San Chyoi hte Seng Tawng de bai gawgap na matu hkyen lajang nga dingyang re lam matut chye lu ai.

Ndai Jak Rung ni hta, lung seng ta chyawp, ta lahkawn waw ai hte lung seng garang shatsawm ai hpaji ni hpe madung dat sharin sa wa ai rai nna, amyu shadang sha ni mung shanglawm sharin hkaja la mai ai lam chye lu ai.

Photo; Facebook