Hpakant ginra kaw nga ai company nkau dawnghkawn hpraw sharawt

Hpakant ginra nga laknak lang hpyen dap rai nga ai KIA kaw nna sadi jaw ndau da ai hpe hkungga masat masa galaw ai hku nna Myen hpyen Balik ni hte Hpakant ginra na company nkau ni gaw tinang a company wang kata April praw 3 ya shani dawnghkawn hpraw sharawt da ai lam, ginra masha ni shana wa ai kaw na chye lu ai.

Ya na zawn dawnghkawn praw sharawt ai lam gaw, laiwa sai ten Hpakant ginra kaw na company ni hta, Myen hpyen la Balik ni sin kawp galaw ya ai rai nna, laiwa sai bat laman KIA hte Gumshem Myen Hpyen Dap ni gasat poi laja lana bai byin ai majaw, Hpakant ginra na company nkau gaw KIA kaw nna sadi jaw ndau da ai hpe hkungga ai hku nna company wang kata Myen hpyen Balik nnga sai lam masat masa dawnghkawn hpraw sharawt da ai re lam, Hpakant Wunpawng Amyusha Zinlum Hpung na salang langai tsun ai.

Hpakant ginra hta gaw Myen Hpyen Dap a company law malawng nga ai rai nna, company shagu Myen hpyen la hte Balik ni law malawng sinkawp hku nna shanu nga ai ginra re.

Ya aten Hpakant ginra hta laknak lang wuhpung wuhpawng ni hte mungshawa yawng galoi mung sadi maja nga ai lam chye lu ai.