Hpakant hte Langse ginra Myen hpyen dap ni nbungli hte wa gap gasat
Hpakant hte Langse ginra hta gumshem Myen hpyen dap ni nbungli hte wa gap gasat ai lam chye lu ai.
October shata 21 ya jahpawt hkying 7:30am aten daram hta Hpakant Masat (6) Dap Dung ginra, Bum Nan mare grup yin de gumshem Myen hpyen dap ni Y-12 nbungli hte bawm 40 lang daram wa gap gasat ai lam, lit nga ai salang ni kaw na chye lu ai.
Langse ginra hta mung dai ni hkying 11:00am aten daram hta Myitkyina kaw na rawt lung wa ai, gumshem Myen hpyen dap Y-12 nbungli hte bawm wa jahkrat bun ai lam chye lu ai.
Ya wa gap gasat ai shara ni hta gasat gala majan byin ai lam nnga ai raitim, gumshem Myen hpyen dap ni gaw nbungli hte hkrum mara wa gap gasat ai re lam chye lu ai.
Manmaw hpyen man ginra hta mung, shani shagu ngu na gasat gala majan matut byin nga ai hta gumshem Myen hpyen dap ni nbungli, drone, laknak kaba ni hte ding yang wa gap gasat nga ai rai nna, lahkawng maga hpyen masa shaja hkat nga ding yang re ai lam chye lu ai.
