Hpakant-Jahtu Zup mare na ramma langai ndup abyen zingri hkrum
Hpakant Ginwang Warazup Ninghtawn Jahtu Zup mare na Salang Lamai Brang Nu ( ဦးေဆြဦး ) hte Jan Jehkum Ja San yan a kasha asak (20) ning re ai Shadang Lamai Htoi Bawk hpe August shata 24 ya shana daw aten hta Sam Hkyeng Pyi Tu Tsit hpyen hpung ni jawm adup abyen ai lam na chye lu ai.
“Dai la kasha ni gaw mare kaw zaibru hte nlung kasha lam galaw taw nga ai re. Dai zaibru nlung kasha wa htaw ai da. Dai sa htaw la na wa ai shaloi Sam Hkyeng Pyi Tu Tsit shagyit kaw shanhte lai wa ai shaloi she shagyit kaw na sumri hte mawdaw kasha kaw na chyamna ( ဘက္မွန္ ) mahkai mat wa ai da, dai majaw Sam Hkyeng Pyi Tu Tsit ni gaw marawn tsun ai da. Dai shaloi she mawdaw kasha kaw na la kasha dai wa gaw mawdaw ntsa kaw na hpun tawng hpai ti yu wa ai da. Nanhte hpa byin mayu ai ngu tsun hkat let ga law hkat hpang wa ai kawn abyen hkat ai ga rai nga ai” nga nna Jahtu Zup mare na Uphkang Salang Lamung Naw Di tsun dan ai.
Zaibru nlung kasha sa htaw ai hta Shadang Htoi Bawk hte rau ramma manang marai 3 mung lawm ai raitim ndai manghkang gaw Lamai Htoi Bawk hte sha byin ai re.
Ya aten hta Shadang Htoi Bawk gaw Baw, Na hte kan ni hta gayet hkra ai rai nna grai sawng mat ai majaw Myitkyina tsirung kaba hta hkyak hkyak tsi mawan ra ai machyi masha langai hku nna tsi tsi hkamla nga ai re.
Machyi hkrum ai nta masha ni kaw nna mung lak san amu shawk shawn, tara jawat ai hku nre sha, sharin shaga ya rit ngu ai masa hku nna ေျမာက္ပိုင္းတိုင္း (မ.ပ.ခ) de laika bang da ai re hpe mung matut chye lu ai.
Ndai Pyi Tu Tsit ni a shagyit gaw Lawt Ta mare maw kata shang wa ai laiwa laisa masha ni hpe jen jep ai shagyit rai nhtawm ndai shagyit hpe 2018 ning kaw nna tawn da sai shagyit mung re.
Pyi Tu Tsit ngu ai gaw laknak lang ai wuhpung wuhpawng langai re hte maren shi a rit kawp tara hpe mung tup hkrak hkan nang hkan sa ai nre. Bai nna ndai kaw shang lawm ai masha ni gaw anhte ginra masha mung nre majaw tara hpe nhkan sa lu ai re. Ya na zawn mare kaw lak nak lang nna, mung masha hte gayau gaya rai nga ai gaw nhkrak ai ngu mu mada ga ai, nga nna ginra masha ni tsun dan ai kaw na matut chye lu ai.
Ndai zawn re adup abyen ai lawng lam ni gaw shawoi shaning ni hta nbyin ga ai re hpe mung chye lu ai.
