Hpakant Kade mare kaw masha marai 5 nhkyi galun hkrum
Hpakant, Lawnghkang Rap, Kade mare Wan Sat Rung wang kaw November shata praw 1 ya shana hkying 9:00-10:00pm aten laman hta, Lung Seng lauban U Kyaw Khine gaw masha marai 5 hpe nhkyi hte galun da ai lam na chye lu ai.
Nhkyi galun hkrum ai ni gaw Shadang Di Ram asak 24, Shadang Maru Mun Awng Ja asak 20, Shadang Hpre Ram Sa asak 21 ( Wan Sat Ma) ni rai nna, Salang Marip Tu Mai asak 37 (Pat Jasan bungli) hte Awng Myin Oo asak 24 ning (lung seng tam hkawngma) ni re lam chye lu ai.
Galun hkrum ai hta, U Kyaw Khine shi a hkawngma Awng Myin Oo gaw asak si sum mat sai rai nna, ngam ai marai 4 gaw ningma grai sawng ai majaw, ya aten Myitkyina Tsi Rung kaw marai 3, Lawnghkang Tsi Rung kaw marai langai tsi tsi hkam la nga ai lam na chye lu ai.
COVID-19 ana nnan byin hpang wa ai ten, pru/shang gawnhkang gate galaw ai shaloi, hkawm sa hkawm wa masha ni gaw tsun shaga yak ai lam ni nga ai re. Nhkyi galun ai lauban wa a hkawngma hte laubau wa mung tsa lu nna wa ga law saw ai majaw, Wan Sat Rung ni kawn tsun shadum ai lam ni nga sai raitim, bai nhtang sa wa nna ga law sa saw ai majaw, sharin shaga ai hpe mangut tawn nna ya na zawn galaw ai masa re lam, Wunpawng Amyusha Zinlum Hpung Muna Kyithkai Hpu-awn, Kade mare ginra masha Sara Maran Tu Lum tsun dan ai.
“Mana gaw Ra lata poi na matu gate ni yawng dawm nna hkring nga ai ten, masha tsawmra nga taw ai kaw shaga masu su nna yawng hpe galun kau da ai” nga nna tsun ai.
Ya na zawn byin ai lam gaw COVID-19 ten ladaw re majaw, mare pru/shang gawnhkang ai lam hta woi awn ai wuhpung ni hte hkawm sa hkawm wa shawa masha ni a lapran tsun shaga, chye na hkawn hkrang ai lam nnga ai sha n-ga, nanghpam lu sha a majaw re ngu mu mada ai lam, sara matut tsun dan ai.
U Kyaw Khine hpe Kade mare Pat Jasan ni rim da ai kaw na Hpakant Balik Dap de woi mat sai lam, nhkyi galun hkrum ai kaw Wunpawng amyusha marai 4 lawm ai rai nna, Kade mare kaw laiwa sai ten hta mung masha adup abyen mabyin manghkang ni nga ai lam chye lu ai.
Photo Credit; Salum Gindai
