Hpakant kaw ga shingbut gyi ai majaw lung seng tam masha marai 2 hka la, marai 3 asak si sum

Hpakant, Seng Tawng mare, Sabaw hte Bum Nan lung wa ai lam lapran kaw December shata 14 ya shana hkying 10:30pm aten hta, Myanmar Thura lung seng company nhkun dingsa kaw na pe 100 daram tsaw ai ga shingbut gyi hkrat wa ai majaw, lung seng tam nga ai masha marai 2 hka la, marai 3 asak si sum mat ai lam na chye lu ai.

Asak si sum mat sai Salang Lahpai La Doi asak (42) ning, Shadang Ndup Naw Tawng asak (22) ning hte Shadang Lahpai Brang Tawng asak (16) ning ni gaw Nambaw mare hte Nam Si Awng mare kaw na rai nna, moimang hpe gaw Sabaw mare Dinghka shinggyim nauna hkye mawoi hpung ni sa shaw la nhtawm, December shata 15 ya shani makoi mayang kau sai lam, hka la hkrum ai Shadang Sut Jum asak (19) ning hte Shadang Naw Naw asak (16) ning yan gaw Sabaw mare kaw na rai nna, ya aten Hpakant Mungshawa Tsi Rung kaw tsi tsi hkam la nga ai lam, Sabaw mare na Sara Palawng Seng Myat Naw tsun dan ai.

Hpakant Maw ga ginra hta gaw lung seng htu tam ai lam hpe madung kan bau bungli hku nna galaw sha nga ai ginra re majaw, ya na zawn ga shingbut n gyi hkra lit nga ai salang ni kaw nna atsawm sha gawnhkang ai lam galaw ya yang kaja ai lam, Sara Palawng Seng Myat Naw matut tsun ai.

Hpakant ginra hta ya na zawn ga shingbut gyi nna masha asak si sum ai lam jahkring hkring byin ai raitim, lit nga ai salang ni kawn ja ja ahkyak la gawnhkang ai lam nnga ai re.

Hpakant ginra hta COVID-19 ana zinli kap bra sawng nga ai aten ladaw laman mare pru/shang hkawm sa hkawm wa pat hkum da ai majaw, ginra masha ni galaw lu galaw sha yak hkak hkrum nga ai rai nna, COVID-19 ana zinli positive jep mu lu ai masha yawng marai 290 jan nga sai re hpe mung chye lu ai.

Photo Credit; Fb