Hpakant kaw Myen hpyen dap ni mungshawa marai (3) hpe gap sat
Hpakant ginra kaw gumshem Myen hpyen dap ni mungshawa marai (3) hpe gap sat tawn ai lam chye lu ai.
June shata 12 ya jahpawt hkying 6:00am aten daram hta Hpakant Mawsiza kaw dap jung nga ai, gumshem Myen hpyen dap ni Mawsiza lam mazup kaw mungshawa marai (3) hpe gap sat tawn ai lam, ginra masha ni kaw na chye lu ai.
Hpakant ginra shamu shamawt nga ai, gumshem Myen hpyen dap hte P.T.Ts pawng hpawm hpyen hpung ni gaw, May shata htum wa maga kawn lung seng company, mungshawa ni a dum nta ni hpe wan nat jahten ai lam shani shagu ngu na galaw nga ai sha n-ga, munghsawa ni hpe masha ninggang shatai woi hkam ai lam ni hpe mung, galaw nga ai lam chye lu ai.
Ya aten Hpakant ginra hta gumshem Myen hpyen dap hte P.T.Ts pawng hpawm hpyen hpung ni hpyen shamu shamawt ai lam ni galaw nga ai majaw, gasat gala majan mung jahkring hkring byin nga ai rai nna, gumshem Myen hpyen dap ni laknak kaba, drone bawm ni hte hkrup mara gap gasat ai lam ni galaw nga ai majaw, mungshawa si hkala hkrum ai lam ni law law byin nga ai re.
