Hpakant kaw Myen hpyen dap ni nbungli hte wa gap gasat
Hpakant ginra kaw gumshem Myen hpyen dap ni nbungli hte wa gap gasat ai lam chye lu ai.
July shata 18 ya shana daw hkying 5:40pm aten daram hte 6:00pm aten laman, Hpakant ဗလခ mare kaw gumshem Myen hpyen dap ni Jet nbungli hte bawm lahkawng lang wa jahkrat bun ai lam, ginra masha ni kaw na chye lu ai.
Matut nna Hpakant အထက jawng kaw mung, dai na de hkying 4:00pm aten daram hta Hpakant Byuha kawng kaw dap jung nga ai, gumshem Myen hpyen dap ni laknak kaba gap shadam bun ai majaw, jawng shawng kaw gat dut ai mungshawa ni hte laiwa laisa mungshawa ni hkra hkala hkrum ai lam nga ai hpe chye lu ai.
Hpakant ginra hta ndai laman gumshem Myen hpyen dap ni gasat gala majan nbyin ai shara hkan raitim, nbungli hte shani shagu ngu na gap gasat nga ai majaw, mungshawa si hkala hkrum ai hte dum nta ni mung hten za hkrum nga ai re.
Matut nna Myitkyina Tang Hpre lahta hte Waimaw Lamyang ginra ni hta mung, gumshem Myen hpyen dap ni hpyen n-gun htu shadut shamu shamawt nga ai majaw, KIA ni hte gasat gala majan jahkring hkring byin nga ai sha n-ga, nbungli ni hte mung wa gap gasat nga ai lam chye lu ai.
