Hpakant kaw nbungli hte wa gap gasat

Hpakant kaw gumshem Myen hpyen dap ni nbungli hte wa gap gasat ai lam chye lu ai.

January shata 13 ya shani hkying 10:30am aten daram hta TDU kaw na rawt lung wa ai, gumshem Myen hpyen dap Jet Fighter langai, Hpakant Mazup Yang mare hte San Hka mare kaw bawm wa jahkrat bun nna, jak sinat hte wa gap gasat ai majaw, mungshawa si hkala ai lam, ginra masha ni tsun ai.

Gumshem Myen hpyen dap ni wa gap gasat ai hta mungshawa marai 8 asak si sum ai sha n-ga, marai 20 jan hkala hkrum nna dun nta ni htenza mat ai lam chye lu ai.

Matut nna January shata 11 ya shani hta mung, Hu Gawng Danai ginra Tsan Lun ja maw kaw gumshem Myen hpyen dap ni nbungli bawm wa jahkrat bun ai majaw, mungshawa marai 20 jan si hkala hkrum ai lam byin lai wa sai re.

Ya aten gumshem Myen hpyen dap gaw mung masa, hpyen masa lam amyu myu hta hkrat sum nga sai majaw, nbungli hpe madung dat let mungshawa law law nga ai shara ni hta hkrup mara bawm wa jahkrat gap gasat ai lam ni galaw nga ai re.