Hpakant lam mayan kaw gumshem Myen hpyen hpung hte KIA pawng hpawm hpung ni gasat gala majan byin
KIA Masat (9) Dap Ba ginra, Hpakant lam deng (5) hte deng (6) mayan kaw May shata 22 ya jahpawt hkying 8:00am aten daram hta gumshem Myen hpyen hpung ni hte KIA pawng hpawm hpyen hpung ni gasat gala majan byin ai lam chye lu ai.
Ndai gumshem Myen hpyen hpung ni gaw, Lawnghkang Le Pin kaw nna, deng 5 hte deng 6 maga hpyen n-gun garum sa ai hta KIA pawng hpawm hpyen hpung ni hkap gap gasat dat ai re lam, shawng lam na lit nga ai salang ni kaw na chye lu ai.
Gasat poi byin ai shara de, Hpakant Byuha kawng kaw nna mung laknak kaba hte hkrup mara gap bun ai lam, ginra masha masha ni tsun ai re.
May shata 22 ya shani hta sha, KIA Masat (26) Dap Dung ginra, KIA ni ni shara jahkrat nga ai Sanut Kawng maga de, gumshem Myen hpyen hte Samhkyen SNA pawng hpawm hpyen hpung ni htu shadut lung wa ai majaw, gasat poi byin ai lam, matut chye lu ai.
Manmaw hpyen man maga de mung, gumshem Myen hpyen ni drone, nbung li ni hte bawm jahkrat gasat nga ding yang rai nna, KIA pawng hpawm hpyen hpung ni mung, laknak kaba drone ni hpe htim gasat nga ding yang re lam na chye lu ai.
