Hpakant Lawng Hkang mare hpe n-htoi n-masat ai lock down jahkrat
Photo Credit; EPN
Hpakant Lawng Hkang mare kaw COVID-19 kap bra ana kap ai masha, lani hte lani law jat wa ai majaw Jinghpaw Mung Asuya Hkamja Dap Hkring Mang rung kaw nna matsun hte maren December shata 14 ya shani kaw nna tara shang n-htoi n-masat ai lock down jahkrat da sai lam chye lu ai.
“Mungdaw Asuya kaw nna laika shapraw da sai hte maren ginwang kata na seng ang ai Asuya ni mung December 13 ya shani hta sa yu nna, gara hku galaw na ngu ai hpe lawng hkang mare na seng ang ai Komati salang ni hte bawng ban la rai nna mana gaw laika shapraw ya sai. Matsun hta gaw jahpawt hkying 6:00am aten kaw nna hkying 10:00am aten laman gaw shawoi na hte maren gat sa na ahkang jaw ai. Hkying 10:00am aten kaw nna gaw hpa lam hte raitim mung tsep kawp npru lu sana, nta kata kaw sha rawng ra na hku tara jahkrat ya ai re” nga nna Hpakant Lawng Hkang mare na Salang Hapu Nat Brang Nan tsun ai.
Photo Credit; EPN
December shata 11 ya shani hta Jinghpaw Mung Asuya Hkamja Dap Hkring Mang rung kaw nna Lawng Hkang mare hpe masha pru shang masat na matu ndau laika shapraw da ai rai nhtawm Hpakant ginwang kata na seng ang ai Asuya ni kaw nna mung n-htoi n-masat ai lock down jahkrat na matu December shata 13 ya shana hta matsun laika shapraw ya sai re.
Jahkrat da ai matsun hte maren masat da ai aten hta lai nna shinggan de pru sa hkawm ai lam tsep kawp nmai galaw ai re hte machyi makaw lam, yawn hkyen ai lam nga yang sha mare kaw nna madi shadaw laika hte ahkang lu ai ni sha, shinggan de pru sa hkawm mai ai lam matsun laika hta shalawm da ai re.
Jinghpaw Mungdaw Asuya Hkamja Dap Hkring Mang rung kaw nna shapraw da ai ndau laika hta, jahkrat da ai matsun hte maren nhkan sa ai rai yang kapbra ana makawp ninghkap tara upadi hte ahkyak la sa wa na re lam tsun da ai raitim Lawng Hkang mare masha ni gaw ya aten du hkra tara tawt lai ai lam nnga shi ai re.
Hpakant lawng Hkang mare kaw December (13) ya shani du hkra rai yang COVID-19 ana positive byin ai masha yawng 150 jan rai nna Jinghpaw mungdaw hta COVID-19 ana kap bra masha law dik ginra re hpe mung chye lu ai.
