Hpakant maga na yu wa ai, gumshem Myen hpyen dap ni, mungshawa La wa ngan ni hpe rim woi nhtawm lit gun shangun
Hpakant maga na yu wa ai, gumshem Myen hpyen dap ni gaw, mungshawa La wa ngan ni hpe rim woi la nhtawm shanhte a hpyen lang arung arai lit ni gun shangun ai lam na chye lu ai.
Ndai gumshem Myen hpyen dap ni gaw, November shata 30 ya shani Hpakant maga na yu wa nna, Kap Maw Hkum Tsai Zup mare kyu hpyi bum kaw yup nhtawm, December shata praw 1 ya jahpawt hkying 5:00am aten hta Nam Ya mare gumshem Myen hpyen dap kaw du shang nga sai lam, ginra shiga lawk kaw na chye lu ai.
Rim woi hkrum ai mungshawa ni gaw, Gat Noi, ေက်ာက္ထု, တံတားညီေႏွာင္ mare hte lai wa lai sa hkrunlam hkawm masha, modo la ni yawng marai 60 daram rai nna, modo la ni, hkrunlam hkawm masha ni hte mare masha nkau hpe gaw dai hpawt jen jep nhtawm wa shangun sai raitim, ngam nga ai mare masha nkau mi hpe gaw dat ya ai lam nnga shi ai re.
Gumshem Myen hpyen ni rim woi hkawm ai hta Hkum Tsai Zup mare na KBC nawku hpung woi sara Shapre La Nu mung lawm ai lam na chye lu ai.
Ndai gumshem Myen hpyen hpung ni dai na gaw, Nam Ya mare lawu Hkin Tawng mare kaw bai du nga nna, mare na mungshawa Wunpawng La marai 30 daram hpe mung sinat hte madi la nhtawm woi da ai lam, buga masha ni tsun ai.
Myitkyina gumshem Myen hpyen nbungli dap kaw nna, December shata praw 1 ya shani hta Helicopter nbungli hte Hpakant byuha kawng kaw hpyen lang arung arai malu masha ni hpe wa jahkrat da nna, Myitkyina de bai nhtang yu wa sai lam, Hpakant ginra masha ni tsun ai.
Kamaing byuha kawng na Myen Balik hte Pyi Tu Tsit pawng hpawm hpung ni mung, December shata praw 1 ya jahpawt hkying 6:00am aten kaw nna, Kamai mare shang wa ai Lai Nawng Hka mahkrai kaw lai wa lai sa mungshawa ni hpe sawk jep nga ai lam, mare masha ni kawn chye lu ai.
