Hpakant Maw Mung kaw lungseng nhkun gyi nna masha marai ( 30 ) daram lup si mat

Hpakant, Maw Mung Ayer company ni a shara kaw lungseng sa htu ai mungmasha marai 30 daram gaw, July 24 ya jahpawt hkying 6:00am daram hta ga gyi kaput si mat ai lam na chye lu ai.

Ya na zawn ga gyi ru wa ai lam gaw, company ni bawm gap kanan da ai kaw marang kaba htu wa ai majaw gyi ru wa ai rai nna, ga gyi kaput lawm mat ai hta mying lu hta da ai gaw marai 25 du sai. Ndai kaw mying nlawm ai mung naw nga ai lam, si mat ai ni a moimang hpe ya du hkra langai mung nmu shi ai lam, buga na salang langai shana wa ai.

Ya aten hta mare masha ni hku nna kaput si mat ai ni a moi mang hpe mu tam na matu mai byin ai ladat hte galaw nga ai lam, salang wa matut tsun ai.

Laiwa sai July 14 ya shani hta mung, Lunghkang, Sanghka mare makau na Maha company hte ( 111 ) company shara kaw ga gyi kaput nna masha marai 100 jan gyi kaput si lawm ai kaw na, marai 23 a moimang hpe sha lu shaw la shi ai lam byin lai wa sai.