Hpakant Maw Wan mare kaw nta wan hkru
Hpakant Maw Wan mare kaw April shata 16 ya shana hkying 7:00pm daram hta Salang Hpyen Brang Awng a nta wan hkru ai lam chye lu ai.
Wan hpe shawa n gun hte company hkan na hka htaw mawdaw ni sa jaw nga ai hpang, wan sat mawdaw bai du wa nna aten kadun hta lu shazim kau ai re.
“Wan hkru hpang wa ai lam gaw tup hkrak nchye lu ai. Nta gaw kaba ai re majaw gawk shap ai masha ni mung nga ai. Dai gawk shap ai nta ginsum kaw na shawng hkat hpang wa ai zawn mung nga ai.
Nta madu hte gawk shap rawng ai masha ni yawng hpe Pyada dap de woi mat ai raitim, Dap kaw du yang Pahkam hte bai lu wa ai. Hka Jaw Poi mung ya she ngut ai re majaw rung nhpaw shi ai, rung bai hpaw ai shani she dawdan hparan sa wa na re” nga nna Maw Wan Mare Salang Magawng Naw Seng tsun ai.
Masha hta hkala nba byin ai lam gaw nnga ai raitim, wang kata na nta kaba langai, nta kaji lahkawng hte shat gawk langai hkru lawm mat ai rai nna, gumhpraw manu hku sawn yang kyast 5,000,000 (Sen Manga Shi) daram sum machyi ai lam chye lu ai.
Hpakant Maw Wan mare hta ya na zawn wan hkru ai lam nbyin ai grai na sai rai nna, ndai kalang shawng ningnan wan bai hkru wa ai re lam, buga masha ni tsun ai kaw na chye lu ai.
