Hpakant Mawwan kaba mare makau kaw ga shingbut gyi ai majaw masha 2 asak si sum
Hpakant Mawwan kaba mare makau, ေက်ာက္စိမ္းေတာင္လုပ္ကြက္ေဟာင္း kaw November shata praw 2 ya shana daw hkying 5:30pm aten hta ga shingbut gyi bun nna, lung seng tam masha 2 asak si sum mat ai lam na chye lu ai.
Ga shingbut gyi bun nna asak si sum mat ai yan gaw, Shadang Naw Naw asak (19) ning hte Salang Zau Awng asak (44) ning rai nna, shan yan gaw Myitkyina, Waimaw kaw na re lam chye lu ai.
Mabyin lawng lam gaw လုပ္ကြက္ေၿမဇာေဟာင္း rai nna, marang htu ai hpang re majaw ga gyi kaput mat ai re lam, lung seng tara upade hpe atsawm n jahkrat, asak n jahkrung ai hte lung seng htu ngut ai hpang jep chyoi ai lam gawng kya ai majaw re nga nna Hpakant ginra masha rai nga ai Sara Jangmaw Nawng Lat tsun dan ai.
Hpakant ginra hta lung seng nhkun hte seng nna Asuya kaw nna tara shang htu sha na ahkang jaw da ai lam nnga ai re. Hpakant ginra kaw ga shingbut gyi nna masha asak si sum mat ai grai law sai raitim, seng ang ai asuya ni kaw nna lit la hparan ya ai lam nnga ai re hpe mung chye lu ai.
Photo Credit; Sun Aung
