Hpakant Seng Tawng mare kaw gumshem Myen hpyen hte KIA pawng hpawm hpyen hpung ni gasat gala majan matut byin
KIA Masat (9) Dap Ba ginra, Hpakant Seng Tawng mare na Lucky Men Hotel kaw shara la nga ai, gumshem Myen hpyen hte KIA pawng hpawm hpyen hpung ni September shata 25 ya jahpawt hkying 9:00am aten daram kaw nna gasat gala majan matut byin ai lam chye lu ai.
Majan byin nga ai Seng Tawng mare maga de, Hpakant Byuha kawng kaw nna, laknak kaba hte hkrup mara gap shadam bun nga ai lam, Seng Tawng ginra masha ni tsun ai.
Mani September shata 24 ya shana maga hkying 4:10pm aten daram hta mung, Myitkyina maga na rawt wa ai Jet fighter nbungli hte Seng Tawng makau Yuma mare kaw bawm 2 lang wa jahkrat gasat ai lam, ginra shiga lawk kaw na chye lu ai.
Seng Tawng mare kaw shara la nga ai gumshem Myen hpyen ni hpe September shata praw 7 ya shani kaw nna, KIA pawng hpawm hpyen hpung ni htim gasat ai hta September shata 12 ya shani hta Seng Tawng mare kaw dap jung nga ai gumshem Myen hpyen balik dap hpe gasat padang dip la lu ai re.
Dai shani kaw nna, gumshem Myen hpyen ni Hpakant Byuha kawng kaw nna, Seng Tawng mare grup gra de laknak kaba hkrup mara gap shadam bun ai sha n-ga, nbungli hte mung bawm jahkrat bun ai majaw, mungshawa dum nta tsa kahtap wan hkru hten za mat ai, mungshawa ni asak si sum, hkala hkrum ai lam chye lu ai.
Nmawk hpyen man maga de mung, KIA pawng hpawm hpyen hpung ni hte gumshem Myen hpyen ni hpyen masa shaja hkat nga ding yang re hte gumshem Myen hpyen ni gaw, shani shagu nbungli bawm hte Drone bawm ni gap gasat nga ding yang re, nga nna shawng lam na lit nga ai salang langai kaw na chye lu ai.
