Hpakant, Sha-it Yang (Le Pyin) mare kaw ramma langai wan nat sat hkrum

Hpakant, Sha-it Yang (Le Pyin) mare makau yawng jawm kabai ai meza bum kaw November shata 11 ya shani ramma marai masum gaw, shadang Hkumboi Ja Naw (Naw Naw) asak 18 ning hpe wan nat sat da ai lam chye lu ai.

Mabyin hte seng nna, Hpakant, Sha-it Yang (Le Pyin) mare salang Tsam Zau Mai tsun ai hta “Shanhte lawk (1) kaw na asak 17, 18 re ramma ni hkrai rai nga ai. Masha sat manghkang kaw lawm ai ningbaw wa tsun ai, Naw Naw gaw gumhpraw lu nna, gawng dum, rai dum ai majaw, yu nlu na sat kau ai re ja gumhpraw ra na nre” nga nna tsun ai.

Asak si sum ai Naw Naw gaw, Mugawng Chyuntaw lawk na rai nna, Sha-it Yang (Le Pyin) mare hta Kana Ba hte Kahkau kaw wa nga nhtawm, ja gumhpraw ni lu lang masan sa ai, shi hpe sat ai marai masum gaw, masha ni kaw bungli chyang sha ai masha ni re lam, salang wa matut tsun ai.

Ndai mabyin hta lawm ai ni gaw, shadang Myu Ti Ha asak 20 ning, shadang Awng Chyi Soe asak 17 ning hte shadang Lashi Sut Awng asak 17 ning ni re lam chye lu ai.

Sat hkrum ai Naw Naw gaw, November shata praw 9 ya shana kawn mat mat ai rai nna, 11 ya shani she mare masha ni wan nat sat da ai moimang hpe sa mu ai, moimang hpe shana maga hkying 2:00pm aten hta nat makoi mayang kau sai re.

Masha sat manghkang kaw lawm ai ramma marai masum hpe mung lu rim sai rai nna, Lung Hkang Balik Dap de sa da sai lam chye lu ai.