Hpakant, Tawng Pyu mare hte Mugawng Tsi Rung kaw COVID-19 ana kap ai masha nnan bai jep mu
Hpakant, Tawng Pyu mare hte Mugawng Tsi Rung kaw September shata 19 ya shani COVID-19 ana kap ai masha nnan marai 5 bai jep mu lu ai lam na chye lu ai.
COVID-19 ana jep mu lu ai machyi masha ni gaw Tawng Pyu mare kaw na marai 4 hte Mugawng Myo, Loi Layang Nawng Pung mare kaw na marai 1 re lam chye lu ai.
Ya aten Hpakant Tawng Pyu mare kaw COVID-19 nna kanu jep mu lu ai machyi masha yawng marai 9 nga sai rai nna, ana kap ai masha ni hte hkrum shaga ai masha ni hpe Quarantine bang nhtawm, ana jep chyoi da ai masha tsalam shadang naw nga ai lam, Hpakant Buga Hpung Up Rev. Bau Tu Ja tsun ai kaw na chye lu ai.
Mugawng Tsi Rung kaw na COVID-19 ana kanu jep mu lu ai machyi masha gaw Yangon Shwe Pyi Ta kaw jawng lung nna mare buga kaw wa nga taw ai ten, September shata 9 ya shani kaw nna machyi wa ai majaw, Mugawng Tsi Rung kaw ana jep yu ai shaloi, September shata praw 19 ya shani ana kanu jep mu lu ai lam, Mugawng Loi Layang Mare Uphkang Salang Dumsa Gum Ja Naw tsun ai.
“Yangon Shwe Pyi Ta Myo Ne kaw na wa ai, distance hte upadi 2 ning pang jawngma asak 20 ning re, shi gaw August shata 31 ya shani Yangon kaw na wa nhtawm, September praw 2 ya shani n ta kaw du ai raitim, Salang ni hpe hpa ntsun ai sha dum nta kaw makoi na nga ai, September shata 9 ya shani kaw nna hkum npyaw, sama manam ai ni nna wa, baw ma machyi wa jang she Mugawng tsi rung de ana jep chyoi yu ai shaloi, ya she ana mu jep ai rai nga ai” nga nna tsun ai.
Ana jep mu ai machyi masha a dum nta masha ni hte shi hte hkrum shaga ai masha ni marai 5 hpe Quarantine bang nna ana jep da ai re lam, ya aten Mugawng ginra kata hta COVID-19 ana makawp maga lam hte seng nna shani shana hpaji jaw tsun ndau ai lam ni, masha pru shang manam jep chyoi ai lam ni dingyang galaw nga ai lam, shagyit (gate) hkan nga ai bungli galaw masha ni hte Modo Driver, Sparer ni hpe mung Mask shakap ai lam, lata laraw raw ai hte COVID-19 ana hpe makawp maga shangun mayu ai lam, Salang wa matut tsun ai kaw na chye lu ai.
Ya aten Jinghpaw Mung kata COVID-19 ana zinli kap ai masha Myitkyina Muklum kaw marai 1, Hpakant Tawng Pyu mare kaw marai 9, Mugawng kaw marai 1, Mu Nyin kaw marai 1 hte Manmaw kaw marai 1, yawng marai 13 nga sai hte ya aten tsi rung hta tsi tsi hkamla nga ai machyi masha ni marai 11 rai nna, Moe Nyin hte Manmaw kaw na COVID-19 ana machyi masha gaw ana maitsai sai majaw, tsi rung yu sai lam, Myen Mungdan kata hta mung COVID-19 ana kap ai masha marai 4621, ana hkyemsa wa ai masha marai 1130 hte ana a majaw asak si sum mat sai masha marai 75 nga sai lam, Hkamja Lam hte Ginsup Hkringmang Dap kawn ndau da ai lam chye lu ai.
Photo Credit; EPN
