Hpakant Tawng Pyu mare kaw COVID-19 ana kap ai masha langai jep mu

Hpakant, Aye Mya Taya Lawk Tawng Pyu mare kaw September shata praw 9 ya shani COVID-19 ana kap ai masha langai U Nyi Soe asak (37) ning  hpe jep mu ai lam chye lu ai.

COVID-19 kap ai machyi masha a dum nta masha ni gaw Hpakant Tawng Pyu mare kaw nga ai rai nna, Rahkaing Mung de na bai lung wa ai kaw ana jep mu ai re lam, ya aten shan nu wa ni hpe Hpakant, Ti Da Gu tsi rung kaw tsi tsi hkamla na matu shaga da ai lam, Wunpawng Amyusha Zinlum Hpung Amu Madu Sara Dashi Naw Lawn tsun ai.

“Ndai Rahkain la yan nu wa ni gaw Tawng Pyu kaw nga ai rai nga, Tawng Pyu kaw nna Rahkaing Mung de yu wa nna bai lung wa ai kaw ana kap ai, shanhte gaw Yangon, Mandalay, Myitkyina, Hpakant Modo shap nna dai hku lung wa, Hpakant shang nna Tawng Pyu kaw nhtoi 21 ya naw wa nga nna, Hpakant kaw mung hkawm ra ai hkan yawng hkawm kau da ai rai nga, Quarantine shang na matu shi hpe sa shaga ai shaloi ninghkap ai, tsam mari shaga asawng la nna jep dat yu yang ana mu ai dai majaw, shan nu wa ni yawng hpe Hpakant Ti Da Gu tsi rung kaw tsi tsi ya na matu shaga da sai” nga nna tsun ai.

COVID-19 machyi masha hte rau dum nta masha yawng hpe Qurantine bang da sai rai nna, Hpakant Tawng Pyu mare hte Nammaw mare kaw na ana kap ai masha hte nbungli rau jawn wa ai dum nta masha ni yawng hpe mung lockdown jahkrat da ai re hpe chye lu ai.

Ya aten Hpakant Muklum kata de shang wa ai masha kadai raitim, tinang jarik hte nhtoi 14 ya Quarantine hkamla ra na rai nna, dum n ta kaw nna pru hkawm ai ni yawng n-gup magap (Mask) shakap ra na lam, ahkyak ai lam nnga yang shinggan npru na hte lu sha seng ni hta mung Pase sha la wa na matu, seng ang ai ana makawp ninghkap komiti ni kaw nna hpaji jaw tsun ndau ai lam ni galaw nga ai re hpe chye lu ai.

Hpakant Ginra hta manam jep ai lam hpe laja lana ding yang galaw nga ai raitim, ya na zawn nmyit mada ai sha ana jep mu lu ai majaw grai myit npyaw ai lam, Hpakant ginra gaw masha law law wa zup ai shara re majaw, ana grai kap bra wa na hpe ginra masha ni myit tsang nga ma ai re hpe chye lu ai.