Hpakant, Tawng Pyu mare kaw na COVID-19 ana kap ai masha marai 4 hpe bai jep mu
Hpakant, Tawng Pyu mare kaw na COVID-19 ana kap ai machyi masha ana masat (1712) U Nyi Soe hte hkrum shaga ai masha marai 37 hpe Hpakant Ti Da Gu Tsi Rung kaw ana jep ai shaloi, September shata 17 ya shani ana kanu rawng ai masha marai 4 hpe jep mu lu ai lam na chye lu ai.
Ana kanu jep mu lu ai machyi masha ni gaw num 3, la langai rai nna, dai ana kanu jep mu lu ai masha ni gaw U Nyi Soe hte ni nawn ai Tawng Pyu mare masha ni re lam, Tawng Pyu mare masha ni marai 107 hpe ana jep chyoi da ai lam nga ai hte Tawng Pyu mare hpe mung lockdown jahkrat da sai lam, Hpakant Buga Hpung Up, Rev. Bau Tu Ja tsun ai.
COVID-19 ana kanu jep mu lu ai machyi masha ni gaw ya aten Hpakant Ti Da Gu tsi rung kaw tsi tsi hkamla nga ai rai nna, ana jep mu lu ai machyi masha wa hkawmsa ai shara hte shi hte hkrum shaga ai masha ni hpe mung shaga nhtawm, ana jep chyoi da sai re lam, Wunpawng Amyu Sha Zinlum Hpung Amu Madu Sara Dashi Naw Lawn tsun ai.
COVID-19 ana zinli makawp maga lam hte seng nna seng ang ai Hkamjam Dap kawn matsun ai hte maren hkannang hkansa nhtawm, hkawmsa hkawmwa lam ni, masha hpawng chyawm ai lam ni nau n galaw ai sha, nta nga let COVID-19 ana zinli hpe yawng jawm sadi maja ai gaw madung re lam, Rev. Bau Tu Ja hpaji jaw tsun dan ai.
“Ya ndai Tawng Pyu mare sha nre, ana kap ai wa shara shagu hkawm ai, dai wa hpe htaw lung wa ai Modo la wa mung masha grai htaw da sai, shi hte kanawn ai ni mung grai law sai re majaw, sadi ra sai, ana jep tawn da ai masha ni a mahtai mung garai nlu shi ai re majaw, yawng sadi maja nna hkawmsa ra na re” nga nna tsun ai.
COVID-19 kap ai machyi masha gaw Rahkaing Mung kaw nna Hpakant Tawng Pyu mare de lung wa ai kaw ana jep mu ai re lam, ya aten ana jep chyoi da ai masha ni hpe Hpakant Muklum Di Da Gu Saradaw na Tsi Rung kaw Quarantine bang da ai rai nna, Tawng Pyu mare hta n-ta htinggaw 384 nga ai hte mare masha jahpan yawng marai 1814 tup nga ai lam chye lu ai.
Photo Credit; Fb
