Hpankant Seng Tawng mare kaw gumshem Myen hpyen ni Jet nbungli hte numdaw lahkang lang bawm wa jahkrat
KIA Masat (9) Dap Ba ginra, Hpakant Seng Tawng mare kaw, Septermber shata 16 ya shani gumshem Myen hpyen dap ni Jet nbungli hte numdaw 2 lang bawm wa jahkrat bun ai lam chye lu ai.
“Dai shani ka-ang hkring 12:36pm aten hta numdaw kalang hkying 2:20pm aten hta numdaw lahkawng lang Seng Tawng mare kaw Jet hte bawm wa jahkrat bun ai lam” Seng Tawng mare mungshawa salang langai tsun ai.
Shawng na lang gaw, Seng Tawng lawk (3) kaw rai nna, hpang na lang gaw, Hpapyin hpunggyi jawng makau kaw wa hkrat ai nga na lu ai, mungshawa hkra hkala ai lam hte seng nna nchye lu ai lam, salang wa matut tsun ai.
Dai hpawt jau hkying 2:00am aten daram hta Yuma lung seng gat lawk kaw rawng nga ai, gumshem Myen hpyen hpung ni hpe KIA pawng hpawm hpyen hpung ni sa htim gap ai lam chye lu ai.
Hpakant Dapnu (Tatma) kawng kaw nna mung, Seng Tawng mare grup gra de, laknak kaba gap bun nga ai rai nna, Lacky Men Hotel mayan hkan nta wan naw hkru nga ding yang re lam, ginra masha ni tsun ai.
Seng Tawng mare na mungshawa ni a dum nta tsa kahtap hkru mat sai rai nna, ya aten tinang shimlum dum ai shara de hprawng koi yen nga ai majaw, aten galu rai wa yang garum ningtum ni grai ra wa na re lam, hpyen koi yen ai Seng Tawng mare na salang langai tsun wa ai re.
Nmawk hpyen man maga de mung, gumshem Myen hpyen ni hte KIA pawng hpawm hpyen hpung ni hpyen masa shaja hkat nga ding yang rai nna, Myen hpyen ni gaw, Drone hte nbungli bawm jahkring hkring jahkrat bun nga ai lam, shawng lam na lit nga salang ni kaw na chye lu ai.
