Hparat Panglai laika dum dingshawn akyu hpyi hpawng galaw

Laiza Muklum lawk (5) hta galaw da ai Hparat Panglai laika dum dingshawn akyu hpyi hpawng hpe November shata 11 ya shani hkying 11:00am aten hta galaw ai.

Laika dum a yaw shada lam hpe Du Kaba Sumlut Gun Maw, KIC Ningbaw Malai tsun ai hta “Laika hpe ladat jaw jaw hkaja la nhtawm, laili laika kaw na hpaji hpe tam shawk shagawn hkaja la lu na matu, matut nna mung ndai shara kaw Jinghpaw Wunpawng amyusha ni a laili laika hte seng ai research center hpe hpaw sa wa na re” nga nna tsun ai.

Anhte gaw kawa hpe ya kran ya lang re ai majaw aten na na hkam ai lam nnga ai, dai majaw ndai kawa hpe ladat jaw jaw hte jai lang yang shaning 40, 50 ning hkam ai lam laika dum hpe woi awn gaw gap ai Fr. Jerome Eiphan tsun ai.

Hparat panglai laika hti dum nta hpe lai wa sai March shata kaw na galaw hpang gaw gap hpang wa ai rai nna, Laiza Muklum kaw kawa hte ya na zawn ladat jaw ai hku galaw ai shawng nnan lang re hpe chye lu ai.

Hparat Panglai laika hti dum hpe laiwa sai 2013 ning kaw na hpaw hpang wa ai hta shawng daw gaw laika hpe laika hti dum kaw sa hti ai ladat hku galaw wa ai, 2020 ning hpang kaw na member ladat hku member card galaw let, laika ni hpe hti hkaja wa ai hta ya yang member shang ai laika hti masha 200 daram rai sai lam chye lu ai.