Hpawmi Nang Zing Kai hpe roi rip sat da ai wa hpe rim la lu
Manmaw Ginwang Nalai mare na hpawmi dinggai Nang Zing Kai asak 64 ning hpe June 17 ya shani Hku Li mare shingnawm kaw mazut roi rip sat da ai Myen Amyusha Ngwe Than hpe June 19 ya shani hta rim da lu sai lam na chye lu ai.
“ Roi rip sat tawn da ai shara hta gup ban langai taw nga ai. Dai gup ban hta Ngwe Than nga ai mying kap taw ai re. Dai mying hte san sagawn hkan la lu ai. June 19 ya hta Pyada ni san jep ai shaloi gup ban kaw kap ai mying ngai re nga nna gaw hkamla ai raitim roi rip sat ai gaw ngai nre ngu nhkamla ai. Pyada ni mung shi hpe ndat ai sha naw zing da nga ai. Daini June 20 ya shani bai matut san jep ai shaloi she shi sat ai re lam hkamla ai.” nga nna buga na salang langai tsun dan ai.
Mazut roi rip sat ai wa gaw Shwe Pyi mare kawn Aung Pyi Tar mare hta htawt nga ai U Ngwe Than asak 48 ning ding hku hte rai nna moi lai sai ten hta jawng sara galaw yu ai wa re. Ya aten hta gaw Hka htung ( ေရဘံုပုိင္ ) htu bungli galaw sha ai, dai grup yin kaw hkauna galaw sha ai wa re, shi a ningrum jan mung jawng Saranum langai re ai lam Na Lai mare na Sara Paw Lu tsun ai kawn na chye lu ai.
