Hpu-awn shalat, mungshawa tsi jawng hte hpyen du shalat jawng ma ni a pawnghpawm Christmas akyu hpyi hpawng galaw
Laiza Muklum, Nazaret Zinlawng hpung wang kaw December 26 ya jahpawt hkying 9:00am aten hta Hpu-awn shalat jawng, mungshawa tsi jawng hte hpyen du shalat jawng ma ni a pawnghpawm Christmas akyu hpyi hpawng galaw ai lam chye lu ai.
Ndai jawng masum na jawng ma ni a pawnghpawm kanawn mazum Christmas akyu hpyi hpawng lamang byin tai wa na matu hte ra ai ja gumhpraw, malu masha ni hpe gaw Salang Kaba Labya Tang Gun ( Mungchying Uphkang Dap Lithkam ) kaw nna lit la ya ai kata kaw komiti hpaw nna galaw ai re lam, Hpu-awn Shalat Jawng Up Salang Kaba Ndau La Seng tsun dan ai.
Pawnghpawm kanawn mazum Christmas akyu hpyi hpawng galaw ai a yaw shada lam hpe Salang Kaba Labya Tang Gun ( Mungchying Uphkang Dap Lithkam ) ya na zawn tsun ai.
Hpyen Dap hte Uphkang Dap gaw gara hku mi nga nga hka n mai ai, Unit langai kaw madu jan madu wa zawn magam bungli wa galaw na hpa-awn yan re. Dai majaw Hpu-awn shalat jawng ma ni Hpyen Du jawng ma ni htawm hpang de shawnglam de ang wa ai aten hta e, hku hkau chyalu rai na, tsawra hkat chyalu rai na, ganawn pyaw na, bungli rau jawm galaw ai hta angwi apyaw rai nna Amyu hte Mungdan a magam bungli jawm galaw ai share ninghkring ni rai mu ga ngu yaw shada let galaw ai re, nga nna tsun ai.
Ya na zawn jawng masum pawnghpawm nna Christmas akyu hpyi hpawng galaw ai shawng ningnan lang rai nna, 2017 ning hta gaw Hpyen Du jawngma ni hte Hpu-awn Shalat jawngma ni pawnghpawm galaw lai wa sai re lam chye lu ai.
