Hpunau Balawng ni hte du wa na ra lata poi hte seng nna gara hku shang lawm hparan na lam Sammung htunghking hpung ni daw dan
Mungmyit Sinli (Kachin-Sub State) Wunpawng Laili Laika hte Htunghking hpung ni a Ginjaw Komiti ra ahkyak zuphpawng hta hpunau Balawng ni hte seng nna gara hku jawm hparan sa wa na ngu ai hte ra lata poi hte seng nna mare masha ni hpe gara hku hpaji jaw na ngu ai lawng lam ni hpe bawng ban daw dan la lu sai lam chye lu ai.
Ndai Ginjaw Komiti ni a ra ahkyak zuphpawng hpe August shata praw 5 ya shani hta kutkai kaw hpaw da ai Mungmyit sinli Wunpawng Laili Laika hte Htunghking rung kaw bawng ban daw dan la lu ai re.
“Ya na zawn ra ahkyak hkrum zup bawng ban ai lam gaw ante buga hta ra kadawn nga ai lam ni hpe bawng ban ai re. Hpunau Balawng ni gaw anhte hpe adip arip rai nna, hpyen hpung ni hku nna mung anhte hpe nsu nnawn galaw ai lam ni grai nga sai. Ga Leng, Nam Hpakka hta byin mat wa ai zawn re ni, kutkai kaw masha sat hkrum ai zawn re ni hte seng nna gara hku shang lawm hparan na ngu ai lam ni hpe bawng ban ai lam re. Bai nna ra lata poi shang ai ten hta Wunpawng hkingmang hte seng nna mung anhte hta lit nga ai ngu ai lam ni hpe hpaji jaw bawng ban ai re.” nga nna Mungmyit Sinli htunghking hpung ningtau ningbaw Zatau Lum Nyoi tsun ai.
Mungmyit Sinli (Kachin-Sub State) ginra gaw lai wa sai July shata laman hta hpunau Balawng ni a mara kata rim, zingri, adup abyen ai lam ni law law lang byin lai wa sai sha n ga, shinggyim ahkaw ahkang tawt lai ai lam hpe nra sharawng ai wuhpung (46) kaw nna mung ndai zawn re lam ni hpe nra sharawng ai lam ndau laika shapraw da sai re.
Du wa na November shata hta galaw mat na rai nga ai ra lata poi hta mung htunghking hpung ni kaw nna pati hpung ni hpe lak san madi shadaw ai lam nre sha dinghkrai ra lata mai shang na re. Bai nna htunghking hpung ni kawn tinang a mare masha ni hpe ra lata poi hte seng nna hpaji jaw sa wa na re lam, htunghking hpung ni kawn chye lu ai.
“Mungmyit Sinli htunghking hpung ningtau ningbaw Zatau Lum Nyoi kaw nna mung “anhte htunghking hpung ni hku nna gaw, anhte buga ginra hte amyu sha ni yawng myithkrum mang rum ai hte jawm shakut nna anhte hta ra wa ai amu magam bungli ni hpe anhte yawng bawng bawng ban ban rai nna, anhte amyu a matu, htunghking a matu hte myusha lam yan ni hta grau na shakut shaja mat wa ga” nga nna hpaji jaw tsun da ai re.
Mungmyit Sinli hta htunghking hpung ni kaw nna uphkang ai ginwang 19 nga ai hta ndai ra ahkyak zup hpawng hta gaw ginwang 17 kaw na htunghking hpung ning baw, amu madu ni sa du bawng ban ai re.
Ndai zup hpawng gaw Mungmyit Wunpawng Laili Laika hte Htunghking hpung ni a lahkawng lang na Ginjaw Komiti ra ahkyak zup hpawng rai nhtawm langai lang na zup hpawng hpe gaw lai wa sai 2019 ning hta galaw la lu sai re hpe mung chye lu ai.
