Hpung htinggaw shagu hpe malu masha garum ya

Myitkyina, Zi-un Buga hkalup hpung woi Sara ni kaw nna woi awn ai hte, Zi-un buga hkalup hpung htinggaw 860 hpe April shata 27 ya shani, n-gu, jum hte sau ni hpe garum ya ai lam galaw ai re hpe chye lu ai.

“Covid-19 ana zinli a majaw, malu masha yak hkak hkrum nga ai, shingan de tam sha na yak ai hpung masha ni hpe yak hkak nga ai laman hta jahkring mi sha pi, lu sha hpe gan lu sha na matu yaw shada let lajang ya ai lam re” nga nna Zi-un Buga Hkalup Hpung Amu Madu Hpungtau Hpauwung La Ja tsun ai.

Ndai kalang gaw shawng nnan lang re majaw, htinggaw shagu hpe garum ya ai lam rai nna, nkau htinggaw ni gaw kaja nan nra ai nga nna bai jaw dat ai mahtai hpe yu nna, kaja nan yak hkak ai ni hpe atsawm sha jahpan la nhtawm, hpabaw ni ra ai ngu ai hpe buga hpung kaw jawm bawng la nna bai garum ya na masing nga ai re lam, Hpungtau Hpauwung La Ja matut tsun ai.

Ya aten Zi-un buga hpung kata hta machyi makaw byin ai lam grai nnga shi ai raitim, hkamja lam nhkak ai zawn re ni nga wa yang, seng ang ai de matut mahkai ya lu na matu Zi-un buga hpung zinlum komiti hpe hpaw shabawn da ai re lam chye lu ai.

Zi-un buga hpung zinlum komiti kaw nna, machyi makaw gan byin hkrum ai ni hpe tsi garum ya ai lam galaw na rai nna, Mask hte ta mawza ni hpe gayan ya na masing mung nga ai re lam chye lu ai.