Hpung jawng sharin Sara shalat hte hpung jat sharin hpawng galaw

Sama Ginwang Hkristan Hpaji Dap Hpung Jawng Komiti kaw nna woi awn galaw ai hpung jawng sharin Sara shalat hte hpung jat sharin hpawng hpe Je Yang KBC Gawknu kaw March shata praw 2 ya shani kaw nna praw 8 ya shani du hkra galaw na re lam chye lu ai.

“Dabang buga Camp kaw na hpung jawng ma ni hpe hpung jawng sharin ai lam hta grau tang du hkra sharin ya lu na matu tatut sharin nga sai sara ni hpe gaw hpung jat ai hku nna sharin ya ai re. Nnan bai sharin na ni hpe gaw sharin sara shalat ai hku nna sharin ya ai, Ma ni mung grau nna Karai mungga lu la ai ni byin tai wa lu na matu sharin sara ni mung n-gun hpring hpring hte sharin hkam la lu na matu yaw shada let sharin sara shalat, hpung jat sharin hpawng galaw ai re” nga nna Sama Ginwang Hkristan Hpaji Dap hpung jawng komiti lit hkam Saranum Hpauyawm Roi Tawng tsun ai.

Sharin Sara ni gaw KBC ECCD lit hkam Sara Hpauyam San Wawm, Sara Daroi Jaw Gun, Saranum Nhkum Nem Ra hte Saranum Hpauyawm Roi Tawng ni sharin ya ai re.

Sharin hpawng hta kalang mung n sharin yu shi ai ni hpe pang mi, sharin nga sai ni hpe pang mi, pang 2 garan nna sharin ya ai lam chye lu ai.

Sharin hpawng hta Je Yang, Hpun Lum Yang, Woi Chyai, Dum Bum, Sha-it Yang, Maga Yang, Sama, Hpa Lap hte bum daw ngu masat da ai hpyen yen dabang, buga hkan na Sara/num ni yawng marai 71 sa du sharin hkam la nga ai rai nna, sharin hpawng hpe shaning shagu galaw ai re lam chye lu ai.