Hpunlum Yang hpyen yen dabang hta nta galaw gram na matu garum ningtum ra ahkyak nga
Laiza makau Hpunlum Yang hpyen yen dabang hta hpyen yen ladaw na wa ai hte maren, dum nta nga shara yawng ngu na daram hten tsam ma wa sai majaw, dum nta galaw gram na matu yak hkak nga ai lam chye lu ai.
“Ndai dum nta ni hpe lai wa sai 2013 ning hta Karuna Mission Social Solidarity (KMSS) ni galaw ya ai re. Dum nta hten tsam ma wa sai majaw matut rawng na matu yak hkak nga ai lam hte, gram sharai la na matu, ja gumhpraw yak nga ai lam, Hpunlum Yang Hpyen Yen Ningtau Dabang Up, Salang Nhkum Tu Lum tsun ai”
Lai wa sai February hte March shata hta gaw, nta 38 hpe KBC HDD hte United Nations High Commissioner for Refugess (UNHCR) ni kaw nna galaw gram ya ai lam nga sai raitim, nta 41 naw gawgap gram ra ai lam nga ai hta Myatta ni kaw nna, nta 10 a matu galaw ya na nga nna tsun da ai lam, Salang wa matut tsun ai.
Malu masha n-gu hte gumhpraw yuan 40 hpe gaw, Hollywood Professional Association (HPA) ni kaw nna garum jaw ai hpe sha, lu sha taw ai. Lai wa sai 3 ning COVID aten kaw na dai ni du hkra kaga wuhpung wuhpawng ni sa garum jaw ai lam nnga mat ai majaw, grai yak hkak nga ai lam, dabang komiti kaw na chye lu ai.
Hpunlum Yang hpyen yen dabang kaw ya aten hta nga ai nta htinggaw yawng 705 nga ai rai nna, masha jahpan yawng marai 3735 nga ai hte mare kahtawng 80 kaw na mungshawa ni shanu shingbying nga ai re hpe mung chye lu ai.
